Tungi soat taxminan 22:30 lar edi. Ziyofatdan chiqqan R.B. piyodalar yo‘lakchasidan uyi tomon borarkan, xonadonlardan biri­ning oldida turgan «Damas» rusumli avtomobilni ko‘rib xayoli buzildi. Uning salo­nidagi qimmatbaho jihozlar yigitchaning nafsini qitiqladi. Asta-sekin mashina oldiga yaqinlashgan R.B. yerda yotgan toshni olib, «Damas»ning oynasini sindirdi. So‘ngra ko‘zini quvontirgan barcha buyumlarni olib, juftakni rostladi.

Ertasi kuni bozorga tushgan huquqbuzar ehtiyot qismlar bilan savdo qiluvchi tadbirkorga o‘marilgan «mollar»ni o‘zimniki deya, aldab sotib, pullarni ehtiyoji yo‘lida ishlatib yubordi. 

Olmaliq shahar IIB Navbatchilik qismiga «sim qoqqan» haydovchi­ning xabariga ko‘ra, tergov-tezkor guruhi bilan birga hodisa joyi­ga chiqqan EKG katta eksperti, podpolkovnik Lutfulla Tolibov ma­shi­na oynasi va uning saloni ichidagi qo‘l-barmoq izlarini oldi. Viloyat IIBB Ekspert-kriminalistika markaziga jo‘natilgan izlar shaxsni identifikatsiya qilish tizimida tekshirib ko‘rilganida, R.B.ga tegishli ekanligi aniqlandi. Surishtiruvlar davomida mashinadan olingan buyumlar egasiga topshirilib, jinoyatchi qonun hukmiga havola etildi.

Tinchlik-osoyishtalikni ta’minlashga munosib hissa qo‘shib kelayotgan tajribali xodim yil boshidan hozirgacha 10 dan ortiq jinoyatning «issiq izida» fosh etilishida shaxsiy namuna ko‘rsatdi. 

– Huquqbuzarlik haqida qanchalik tez xabar berilsa, gumondorni topish ham shunchalik oson bo‘ladi, – deydi biz bilan suhbatda u. – Boisi, jinoyatga aloqador bo‘lgan daliliy ashyolardagi izlar ham o‘z ahamiyatini yo‘qotmagan holda darhol «tilga kiradi».