Hushtak chalma, baqirma, qoʻy soʻyma. Rossiya markaziy osiyolik migrantlar uchun dastur ishlab chiqdi

Rossiya Millatlar ishlari boʻyicha federal agentligi Markaziy Osiyodan kelgan mehnat muhojirlari uchun moslashuv kursi ishlab chiqdi. Ushbu loyihani 'Kommersant' nashri oʻrganib chiqqan. Maʼlum boʻlishicha, kurs 70 daqiqalik maʼruza boʻlib, bu vaqt ichida Rossiya Federatsiyasining migratsiya va mehnat qonunchiligi haqida kerakli maʼlumotlarni oʻrganishi kerak boʻladi.

Shuningdek, qoʻllanmada migrantlarga mamlakatda oʻzini tutish qoidalarini, jumladan, ayollar hamda erkaklarga hushtakbozlik qilmaslik, oʻtkinchilarni ona tilida muhokama qilmaslik tavsiyalari keltiriladi. Bundan tashqari, chet elliklarga tarix saboqlari berilib, SSSR davrida Oʻrta Osiyo respublikalarining rivojlanishi uchun katta miqdorda pul sarflangani uqtiriladi.

Qoʻllanmada maʼruzachi qurollari kuchlarda shartnoma boʻyicha xizmat qilish orqali Rossiya fuqaroligini soddalashtirilgan tarzda olish imkoniyatini eslatib oʻtishi kerak.

Mualliflar rus tilini bilish muhimligini taʼkidlaydilar: 'Ruslar koʻp millatli xalq, lekin hamma rus tilida gapiradi. 'Aka' yoki 'singil' soʻzlari bilan qarindoshingiz, tanishingiz boʻlmagan odamlar bilan muloqot qilish mumkin emas. Chet elliklar oʻtkinchilarni oʻz ona tilida muhokama qilmasliklari, boshqa odamlar oldida oʻz ona tilida pichirlashmasliklari kerak'.

'Rossiya dunyoviy davlat ekanligini yodda tutish kerak. Rossiyada jamoat joylarida biron bir dinga munosabat bildirish, koʻchada diniy marosimlarni oʻtkazish, hayvonlarni qurbonlikka soʻyish, jamoat joylarida ibodat qilish odat tusiga kirmaydi', deyiladi maʼruzada.

Ushbu yangicha tartibda aytilishicha, Rossiyadagi ayollar anʼanaviy ravishda ochiq kiyim kiyishadi va bu tanishish uchun ishora emas. Shuningdek, notanish ayollar va erkaklarga jismonan tegishingiz, yaʼni tegish, chimchilash, quchoqlash, qoʻllaridan ushlash mumkin emas. Bunday xatti-harakatlar bezorilik deb baholanishi mumkin. Bundan tashqari muhojirlar ayol yoki erkaklarning eʼtiborini jalb qilish uchun hushtak chalishi mumkin emas.

Yakuniy qism 'Rossiya va Markaziy Osiyo mamlakatlari oʻrtasidagi munosabatlar tarixi' ga bagʻishlangan. Unda Rossiya va Markaziy Osiyoni bogʻlab turgan doʻstlik rishtalari koʻp asrlik tarixga egaligi tushuntiriladi. Mualliflarning taʼkidlashicha, 19 asrda Oʻrta Osiyoning yerlari Rossiya imperiyasi tarkibiga kirishi hudud iqtisodiyotining rivojlanishiga yaxshi taʼsir koʻrsatgan. SSSR ajratgan pullar Oʻrta Osiyo mintaqasi davlatlarining muvaffaqiyatiga sabab boʻlgan.

'Biz umumiy tariximizni, gʻalaba va magʻlubiyatlarimizni unutmasligimiz kerak. Biz yonma-yon kurashdik va natsizm kabi dahshatli global tahdidga qarshi kurashda gʻalaba qozondik. Agar biz bu aloqani davom ettira olsak, yanada kuchliroq boʻlishimiz mumkin', deydi maʼruza mualliflari.

Biroq, kursning amaliy amalga oshirilishi mutaxassis uchun bir qator savollar tugʻdiradi. Uning soʻzlariga koʻra, hududlarda migrantlar bilan bunday mashgʻulotlarni keng miqyosda oʻtkaza oladigan tuzilmalar va mutaxassislar yoʻq.

Makron Attalning isteʼfosini qabul qildi

Fransiya Prezidenti Emmanuel Makron Bosh vazir Gabriyel Attalning isteʼfosini qabul qildi, ammo undan vaqtinchalik lavozimda qolishini soʻradi.

Seshanba kuni Yelisey saroyining bayonotida aytilishicha, u yangi hukumat tayinlanguncha faoliyat yuritadi. Attalning muvaqqat hukumati joriy ishlarni boshqarib turadi. Bundan tashqari, u 26-iyulda boshlanadigan Olimpiya oʻyinlarini nazorat qiladi.

Muvaqqat hukumat yangi qonunlarni parlamentga taqdim eta olmaydi yoki katta oʻzgarishlar kirita olmaydi.

Fransiyada avval ham muvaqqat hukumatlar boʻlgan, ammo hech biri bir necha kundan ortiq qolmagan. Amaldagi hukumat qancha muddat qolishi mumkinligi boʻyicha hech qanday cheklovlar yoʻq. Parlament uni tark etishga majbur qila olmaydi.

34 yoshli Attal yanvar oyida Fransiya bosh vaziri etib tayinlangan edi. U COVID-19 pandemiyasi davrida mashhurlikka erishdi. Shuningdek, bosh vazir boʻlishdan oldin Fransiya taʼlim vaziri boʻlib ham faoliyat yuritgan.

Bayden saylovdan chiqish shartini aytdi

AQSH prezidenti Jo Bayden agar shifokorlar uning sogʻligʻida muammo borligini aniqlasa, prezidentlik poygasidan chiqishini taʼkidladi.

'Menda qandaydir kasallik boʻlsa, shifokorlar kelib, sizda falon muammo bor deyishardi', dedi u prezidentlik poygasini tark etish haqida gapirar ekan.

'Ochigʻini aytsam, menimcha, qarilik faqat donolik keltiradi', ' deya qoʻshimcha qildi Bayden shu oʻrinda.

Bayden avvalroq, agar Xudo buni buyursa, saylovoldi poygasidan chiqishini aytgan edi.

Shu yilning 27-iyun kuni Jorjiya shtatining Atlanta shahrida Bayden va uning asosiy siyosiy raqibi respublikachi Donald Tramp oʻrtasida teledebat boʻlib oʻtdi. CNN ekspress soʻroviga koʻra, bahsni tomosha qilgan tomoshabinlarning uchdan ikki qismi Tramp gʻalabasini qayd etgan.

AQSHda prezidentlik saylovlari 5-noyabr kuni boʻlib oʻtadi. Ikkinchi muddatga nomzodini qoʻygan Bayden Demokratik partiyadan yetarli miqdordagi delegatning qoʻllab-quvvatlashiga erishdi.

Finlyandiya Rossiya chegarasida devor qurmoqda

Finlyandiya hukumati tomonidan Finlyandiya va Rossiya oʻrtasidagi chegarada devor qurilishi reja boʻyicha amalga oshirilmoqda, deya xabar berdi 'Yle' jamoat teleradiokompaniyasi.

'Sharqiy chegara devori qurilishi reja asosida amalga oshirilmoqda. Qurilish avgust oyining oxirida Janubiy Kareliya muzofoti Nuyyamaa aholi punktida boshlanadi va 70 kilometrni tashkil etadi', deyiladi manbada.

Devorning qurilishi avval sinov panjaralarini qurish bilan boshlangan edi. Loyihaning tajriba bosqichi doirasida Imatra shahri chekkasida uch kilometrga yaqin panjara qurildi.

'Tajriba asosida, masalan, toʻsiqlar tarmogʻi tuzilishiga, shuningdek, elektr va telekommunikatsiya kabellarini yotqizishga kichik oʻzgartirishlar kiritildi', deydi loyiha menejeri Erkki Matilainen.

OAVning qoʻshimcha qilishicha, bu boradagi ishlarning birinchi bosqichi 2025-yilda tugatiladi. Loyihaning asosiy qismi ' 200 kilometrlik panjara 2026-yilning yozigacha qurib bitkaziladi. Panjara asosan janubi-sharqiy chegarada, eng gavjum nazorat punktlari joylashgan joyda quriladi. Finlyandiya Rossiya bilan 1300 kilometrlik chegaraning butun uzunligi boʻylab panjara qurishni rejalashtirmagan.

Finlyandiya 2023-yilning noyabr oyidan boshlab uchinchi davlatlardan qochqinlarning nazoratsiz oqimi fonida chegarani kesib oʻtishda cheklovlar joriy qila boshladi. Finlyandiya rasmiylari Rossiyani chegaraga qasddan boshpana izlovchilarni yuborishda bir necha bor ayblagan.

Rossiya tashqi ishlar vazirligining rasmiy vakili Mariya Zaxarova Rossiyani Yevropa Ittifoqidagi migratsiya inqiroziga aloqadorlikdagi ayblovlarni rad etdi va buni Gʻarbning ikki tomonlama standartlari, deb atadi.

Avvalroq Rossiya prezidentining matbuot kotibi Dmitriy Peskov Finlyandiyaning Rossiya bilan chegaradagi nazorat-oʻtkazish punktlarining yopilishini izohlar ekan, qoʻshni davlat rahbarlari hozir amal qila boshlagan rusofob pozitsiyasidan chuqur afsusda ekanini taʼkidlagan edi.

Gʻazodagi bombardimon qilingan maktab

Isroil 10 kun ichida Gʻazoda BMTga qarashli 6-maktabni bombardimon qildi. Oqibatda oʻnlab odamlar halok boʻlgan.

Isroil kuchlari Nuseyratdagi Al-Rozi maktabiga hamda Al-Mavasidagi xavfsiz hududga hujum qilib, kamida 42 falastinlikni oʻldirdi. Falastin rasmiylariga koʻra, Isroil harbiylari Gʻazo sektorida BMT tomonidan boshqariladigan yana bir maktabni hamda Isroil tomonidan ishlab chiqilgan 'xavfsiz hudud'ni bombardimon qilgan.

Birlashgan Millatlar Tashkilotining Falastinlik qochqinlar boʻyicha agentligi Isroil qoʻshinlari oʻtgan oktyabr oyida urush boshlanganidan beri Gʻazodagi maktablarning qariyb 70 foiziga zarba berganini aytdi. Ushbu maktablarning 95 foizidan ortigʻi zarba paytida boshpana sifatida ishlatilgan.