Dastlab maktabdagi erkin kurash to‘garagiga qatnashib, sportga qiziqishi oshgan Mirshodjon soliq kollejida tahsil olayotganida Buxoro shahridagi «Umid» klubida murabbiyi Homid Rahmatovga shogird tushib, boks bilan shug‘ullandi. Shahar va viloyat miqyosida o‘tkazilgan musobaqalarda ishtirok etib, sovrinli o‘rinlarni egalladi.

Muddatli harbiy xizmatni o‘tagach, 2022-yil IIV Qorovul qo‘shinlari qo‘mondonligiga hujjat topshirdi. Sinovlardan muvaffaqiyatli o‘tib, 7536-harbiy qismda maxsus vazifalarni bajaruvchi safarbarlik vzvodida katta muta­xassis lavozimida xizmat faoliyatini boshladi. 

– Oddiy askar Mirshod Sharopov qobiliyatli, o‘ziga nisbatan talabchan xodim, – deydi harbiy qism Tarbiyaviy va mafkuraviy ishlar bo‘linmasi boshlig‘i, podpolkovnik Elyor G‘afforov. – Uning yutuqlarini ikki yil davomida kuzatib kelaman. Erishgan yutuqlari arzigulik. Misol uchun aytadigan bo‘lsak, 2023-yili Toshkent shahrida o‘tkazilgan IIV Qorovul qo‘shinlari qo‘mondonligi­ning boks bo‘yicha birinchiligida o‘z vazn toifasida birinchi o‘rinni egalladi. Yaqinda jangovar sambo bo‘yicha Qorovul qo‘shinlari qo‘mondoni kubogida ham faxrli birinchi o‘rinni qo‘lga kiritdi. 

Bunday yutuqlarga eri­shishda, albatta, ustozlarining xizmati katta. Sport sohasida Homid Rahmatov, Azamat Ergashovlarning, kasb sohasida esa mayor Nuriddin Jo‘rayev, kapitan Adiz Ravshanovlarning maslahati va yo‘l-yo‘riqlari asqat­moqda. 

– Kimki yaxshi niyat qilib, maqsad sari qat’iylik bilan intilsa, u, albatta, murodiga yetadi, – deya ta’kidlaydi lavhamiz qahramoni. 

Mirzoqul AHADOV,

o‘z muxbirimiz.

Buxoro viloyati.