AQSHdagi Kolumbiya universiteti talabalari politsiyaning keskin qarshiligidan bir oy o‘tib, yana Falastinni qo‘llab-quvvatlash mitingini boshladi. Falastin tarafdori bo‘lgan talabalar kampusda yangi lager tashkil qilib, uni “Rafah qo‘zg‘oloni” deb atashdi. Bu haqda “Anadolu” xabar berdi.

Namoyishchilar matbuot anjumani uyushtirdi, biroq jurnalistlar kampusga kiritilmadi va talabalar jurnalistlarning savollariga panjara orqali javob berishga majbur bo‘ldi. Matbuot anjumanida gapirgan Kolumbiya universiteti talabasi Mahmud Xalil lagerni “Rafah isyoni” deb ataganlarini aytdi.

Xalilning iddao qilishicha, lager tashkil etilgandan so‘ng maktab xavfsizligi xodimlari ularga ogohlantirmasdan hujum qilib, chodirlarni tortib olgan va ikki talabani jarohatlagan.

Lagerdagi talabalaridan biri Leyla Soliba universitetning talabalarga bo‘lgan munosabatidan afsusda ekanini bildirdi.

“Bu ta’lim muassasasi. Bu investitsiya fondi emas, bu biznes emas va ular o‘z talabalariga yaxshi munosabatda bo‘lishlari kerak. Bu juda qo‘rqinchli. Ushbu holatni qabul qilib bo‘lmaydi”, deydi Leyla.

Matbuot anjumanidan so‘ng, Falastin tarafdori bo‘lgan Kolumbiya universitetining bitiruvchilari ham kampus tashqarisida namoyish qilishdi. Miting chog‘ida namoyishchilar “Ozod Falastin”, “Oshkora, yo‘q qiling, to‘xtamaymiz, tinchlanmaymiz” va “Yo‘l bitta: talabalar inqilobi” kabi shiorlar bilan hayqirdi.

Eslatib o‘tamiz, avvalroq Qo‘shma Shtatlarda boshlangan talabalar namoyishi 3 may  kuni Yevropaga ham ko‘chgani xabar qilingandi. Parijdagi Siyosiy tadqiqotlar institutining o‘nlab talabalari politsiya tomonidan hibsga olingan. Ular G‘azo sektori aholisini qo‘llab-quvvatlab, Falastin bayroqlarini ko‘tarib, Isroil bosqiniga qarshi shiorlar aytgan. Oqibatda universitet darslari ma’lum muddatga qoldirilgan.

Toir Obidov