Turkiya Prezidenti Rajab Toyib Erdo‘g‘an AQSH va G‘arb davlatlarini G‘azo sektoridagi qon to‘kilishi va “Isroil vampirizmi”ga sheriklikda, BMTni esa harakatsizlikda aybladi. Bu haqda u bugun, 29 may kuni hukmron “Adolat va taraqqiyot” partiyasi fraksiyasi yig‘ilishida aytdi.

“Isroil xalqaro huquq nazoratiga o‘tguncha va o‘zini xalqaro huquq bilan bog‘langan, deb hisoblamaguncha hech bir davlat xavfsiz bo‘lmaydi. Dunyo televideniye orqali Netanyaxu ismli vampirning vahshiyligini tomosha qilmoqda. Isroil G‘azoda insoniyatni yo‘q qildi. Hoy, Amerika davlati, bu qon sizning qo‘lingizda. Yevropaning davlat va hukumat rahbarlari, siz bu vampirizmga sherik bo‘ldingiz! Birlashgan Millatlar Tashkiloti, XXI asrda butun insoniyat jonli ravishda tomosha qilayotgan genotsidni to‘xtata olmasangiz, sizga nima kerak? Dunyoning kelajagi Xavfsizlik Kengashidagi besh davlatga bog‘liq bo‘lsa, bu ulkan binolar nega kerak?” deydi Erdo‘g‘an Isroilni G‘azoda sodir etilgan insoniyatga qarshi jinoyatlar uchun javobgarlikka tortishga chaqirib.

Erdo‘g‘an Falastinni Ispaniya, Irlandiya va Norvegiya tomonidan tan olinishini ijobiy deb atadi va boshqa davlatlarni ham ulardan o‘rnak olishga chaqirdi. 

“Hozirda 147 davlat Falastinni davlat sifatida tan olgan. Ularning qarorini e’tiborsiz qoldirib bo‘lmaydi va Xavfsizlik Kengashi besh a’zosining o‘zboshimchaliklariga yo‘l qo‘yib bo‘lmaydi. Insoniyatning umumiy vijdoni beshta davlatdan kattaroqdir. Isroil va uni qo‘llab-quvvatlovchi davlatlar G‘azoda genotsid borligi unutiladi, deb o‘ylamoqda. Yo‘q, na genotsid, na vahshiylik unutiladi”, degan Turkiya Prezidenti.

Isroiljon Ikromov