Vashington Amerika qo‘shinlarini Suriyadan to‘liq olib chiqish imkoniyatini ko‘rib chiqmoqda. Bu haqda Davlat departamenti va Pentagondagi manbalarga tayanib, “Foreign Policy” jurnali xabar berdi.

Qayd etilishicha, Oq uy AQSHning Suriyadagi missiyasidan endi manfaatdor emas, uni “keraksiz” deb hisoblaydi va endi unga mablag‘ ajratmayapti. 

“G‘azo sektoridagi voqealar munosabati bilan Yaqin Sharqdagi keskinlik avjiga chiqdi”, deb yozadi nashr.

Manbaga ko‘ra, mintaqaviy inqiroz sharoitida Bayden ma’muriyati Yaqin Sharqdagi harbiy ustuvorliklarini qayta ko‘rib chiqmoqda. Amerika ma’muriyatida qo‘shinlar qachon va qanday olib chiqilishi mumkinligi haqida munozaralar davom etmoqda, ammo yakuniy qaror hali qabul qilinmagan.

Keyinroq Oq uy “Al Arabiya” telekanaliga bergan izohida bu ma’lumotni rad etdi.
Mintaqadagi asosiy o‘yinchilardan biri Turkiya esa Amerika qo‘shinlarining Suriyadan olib chiqish rejalari haqidagi xabarlarga ehtiyotkorlik bilan yondashmoqda. “Hürriyet” gazetasining yozishicha, Anqara AQSHning nafaqat Suriyadan, balki butun Yaqin Sharqdan ham chiqib ketishga intilish tendensiyasini ko‘rmoqda.

“Rasmiy bayonotlar va aniq qadamlar ko‘rmasdan AQSHning mintaqadan qo‘shinlarini olib chiqish rejalari haqidagi xabarlarga ehtiyotkorlik bilan yondashish kerak”, deb yozadi turk nashri respublika Mudofaa vazirligidagi manbalariga tayanib.

Unga ko‘ra, AQSH Isroil va Eron tomonidan Yaqin Sharq “botqog‘iga tortilganini”, ayniqsa, G‘azoga hujumidan keyin Isroilga so‘zsiz yordam berib, tuzoqqa tushib qolganini anglagan.

“Bu jarayon Qizil dengizdan Pokistongacha bo‘lgan hududga tarqala boshladi. Shu munosabat bilan AQSH muammoga yechim izlay boshladi”, deb yozadi gazeta sharhlovchisi Abdulqodir Selvi.