Olimlar kichik asteroidni Yer atmosferasida yonib ketishidan ikki soat oldin topdilar. U sayyoramiz tomon uchayotgan samoviy jismlarni kuzatuvchi monitoring tizimlarini chetlab oʻtishga muvaffaq boʻldi. Asteroidga 2024 UQ nomi berildi. Uning diametri 1 metrdan oshmagani uchun u hech qanday xavf tugʻdirmadi. 22-oktabr kuni asteroid 'Asteroid oxirgi ogohlantirish tizimi' (ATLAS) tomonidan aniqlangan. Bu Gavayidagi toʻrtta teleskopdan iborat tarmoq boʻlib, ular doimiy ravishda osmonni harakatlanuvchi obyektlarni tekshiradi. Ikki soatdan keyin asteroid Tinch okeani ustidagi atmosferada yonib ketdi. Teleskoplar asteroidni sayyoraga toʻgʻridan-toʻgʻri yaqinlashgandan keyingina 'sezdi'. Olimlarning tushuntirishicha, ATLAS toʻqnashuv ehtimoli yuqori boʻlgan jismni oʻz vaqtida aniqlay olmagan, chunki u ikki qoʻshni maydon chegarasi yaqinida joylashgan. 2024 UQ bu yil Yer bilan toʻqnashgan uchinchi obyektdir. Kengligi taxminan bir metr boʻlgan 2024 BX1-yanvarda Berlinda yonib ketgan, 2024 RW1 sentabr oyida Filippinda portlagan. Olimlar nafaqat asteroidlarni kuzatish texnologiyalarini, balki Yer uchun xavfli obyektni boshqa yoʻnalishga yoʻnaltirish qobiliyatini ham ishlab chiqmoqda. 2022-yilda NASA kosmik apparati ikkilik asteroid tizimiga qulab tushdi va Dimorf nomli obyektni orbitadan burib yubordi. Toʻqnashuv tezligi soatiga 22 ming kmdan oshdi.