"Yuksalish" umummilliy harakati raisi, Oliy Majlis deputati Bobur Bekmurodov Energetika vazirligidan gaz masalasida Rossiya bilan imzolagan «Yo'l xaritasi» mazmuni haqida jamoatchilikka maʻlumot berilishini so'radi.

"O'zbekiston energetika vazirligi va "Gazprom" o'rtasida gaz sohasida o'zaro hamkorlik qilish bo'yicha "Yo'l xaritasi"ning imzolangani ijtimoiy tarmoqlar faollari va jamoatchilikda savollarni uyg'otdi.

Yaʻni, energetika tizimi mustaqilligiga tahdid deya qaralayotgan "Gaz ittifoqi" loyihasi tomon qadam sifatida talqin qilinmoqda.

Avvalo, Energetika vazirligi mazkur "Yo'l xaritasi"ning umumiy mazmuni haqida jamoatchilikka xabar berishi lozim deb hisoblaymiz. Kelgusida bunday hujjatlar haqidagi maʻlumotlar, avval vazirliklarimiz rasmiylari tomonidan eʻlon qilinishi kerak.

Shu bilan birgalikda, huquqiy jihatdan, "Yo'l xaritasi" tomonlarga hyech qanday majburiyat yuklaymaydi, huquqiy oqibat tug'dirmaydi. Tomonlarning hamkorlikdagi harakatlarini muvofiqlashtirishga xizmat qiladigan hujjat turi hisoblanadi.

Qolaversa, 2022 yilning dekabr oyida energetika vaziri Jo'rabek Mirzamahmudov bu borada qatʻiy pozitsiyamizni eʻlon qilgan edi:

"...Biz gaz va elektr energiyasini qandaydir alyans yoki ittifoq orqali emas, balki qo'shni davlatlardan import qilish bo'yicha muzokaralar olib bormoqdamiz".

Milliy manfaatlarimiz uchun bu eng to'g'ri pozitsiya ekanligini taʻkidlagan holda, Hukumatning energetik inqirozni bartaraf etish hamda kelgusida bunday xavflarni oldini olishga qaratilgan qo'shimcha diplomatik va amaliy harakatlarini qo'llab-quvvatlash lozimligini bildiramiz", deb yozgan Bobur Bekmurodov.