Bosh prokuratura huzuridagi Departament Qarshi shahrida 232,8 million soʻmlik tabiiy gazdan noqonuniy foydalangan sexni aniqladi. Bu haqda Departamentning matbuot xizmati xabar berdi.

Maʼlum boʻlishicha, Bosh prokuratura huzuridagi Departamentning Qashqadaryo viloyati boshqarmasi tomonidan oʻtkazilgan tergovga qadar tekshiruvda noqonuniy holat fosh boʻlgan.

Qayd etilishicha, fuqaro A.N. va boshqalar tegishli tartibda davlat roʻyxatidan oʻtmasdan Qarshi shahri 'Naqshab' MFY hududidagi xonadonda novvot ishlab chiqarish sexini tashkil etishgan.

Ushbu sex boshqaruvchilari umumiy foydalanishdagi gaz tarmogʻiga yashirincha ulanib, jami 232,8 million soʻmlik tabiiy gazdan noqonuniy foydalangan.

'Mazkur holat yuzasidan Jinoyat kodeksining 169-moddasi (oʻgʻrilik) bilan jinoyat ishi qoʻzgʻatilib, tergov harakatlari oʻtkazilmoqda', deyiladi xabarda.

Avvalroq, Urganch shahrida 2,9 milliard soʻmlik noqonuniy dori vositalari aniqlangandi.