Rossiya Xalqaro jinoiy sud yurisdiksiyasini tan olmaydi, Rossiya Xavfsizlik kengashi kotibi, sobiq mudofaa vaziri Sergey Shoygu va Bosh shtab boshlig‘i Valeriy Gerasimovni hibsga olish orderini bema’nilik deb atadi. Bu haqda Rossiya Prezidenti matbuot kotibi Dmitriy Peskov ma’lum qildi.

“Biz ushbu sudning yurisdiksiyasini tan olmaymiz, biz nizom a’zolari emasmiz, biz bu buyruqlarni tan olmaymiz. Biz ularni xuddi davlat rahbari, bolalar ombudsmani bilan bog‘liq bo‘lgan so‘nggi ikki buyruq kabi bema’ni deb hisoblaymiz”, deydi u.

Ma’lumot uchun, 2023 yilning 17 martida XJS Rossiya Prezidenti Vladimir Putin va bolalar ombudsmani Mariya Lvova-Belovani “bolalarni Ukrainadan noqonuniy olib chiqish” aybi bilan hibsga olishga order berdi. Rossiya ayblovlarni rad etib, bolalarni o‘qqa tutilgan xavfli zonalardan olib chiqayotganini tushuntirdi.

Eslatib o‘tamiz, kecha, 25 iyun kuni XJS sobiq mudofaa vaziri, Rossiya Xavfsizlik kengashi kotibi Sergey Shoygu va Bosh shtab rahbari Valeriy Gerasimovni hibsga olishga order berdi. Sabablar orasida sud Ukrainadagi energetika ob’ektlariga hujumlarni ko‘rsatdi.