Rossiya Prezidenti Vladimir Putin joriy yilning 18-19 iyun kunlari davlat tashrifi bilan Koreya Xalq Demokratik Respublikasida bo‘ladi. Bu haqda Kreml matbuot xizmati xabar berdi.

Keltirilishicha, KXDR raisi Kim Chen Inning taklifiga binoan, Putin ikki kun davomida ushbu davlatda bo‘ladi.

Ma’lumot uchun, Shimoliy Koreya yetakchisi Kim Chen In 2023 yil sentyabrida Putinning taklifiga binoan Rossiyaga rasmiy tashrif bilan kelgan edi. Rossiya Federatsiyasi KXDR chegaralari yopilgan koronavirus pandemiyasi boshlanganidan beri Shimoliy Koreya rahbari tashrif buyurgan birinchi davlat bo‘ldi. O‘shanda 10 sentyabr kuni Kim Chen In Pxenyandan Rossiyaga maxsus poyezdda yo‘l olgandi. 12 sentyabr kuni Rossiyaga kelgan Kim Chen In Tabiat vaziri Aleksandr Kozlov va Primorsk o‘lkasi gubernatori Oleg Kojemyako bilan muzokara o‘tkazdi. 

13 sentyabrda Shimoliy Koreya yetakchisi Prezident Putin bilan “Vostochniy” kosmodromida uchrashdi. Ular qisqa suhbatdan so‘ng kosmodromdagi ob’ektlarni ko‘zdan kechirdi. Keyin esa davlat rahbarlari boshchiligidagi delegatsiyalarning muzokaralari bo‘lib o‘tdi. Shundan so‘ng, Kim Chen In sharafiga rasmiy tushlik uyushtirilgandi. 

Rossiyaning sharqiga tashrif buyurgan Kim Chen In endilikda Rossiya Prezidentini o‘zi uchun qulay vaqtda javob tashrifiga taklif qildi.

Shu bilan birga, Putin 19-20 iyun kunlari Vetnamga boradi. Rossiya va Vetnam o‘rtasidagi savdo-iqtisodiy, ilmiy-texnikaviy va gumanitar sohalarda har tomonlama strategik sheriklikni yanada rivojlantirishning holati va istiqbollarini muhokama qilish, shuningdek, xalqaro va mintaqaviy kun tartibidagi dolzarb masalalar yuzasidan fikr almashish rejalashtirilgan.

Asadbek Komilov