Sharof Rashidov atoqli davlat arbobi bo‘lish bilan birga, ulkan so‘z san'atkori, mohir tarjimon, inson qalbining zukko bilimdoni edi. Uning yoshlik, bahor, go‘zallik, ezgulik, Vatan mehri tarannum etilgan asarlari xalqimiz qalbidan chuqur joy olgan. Xususan, «Kashmir qo‘shig‘i», «Ikki dil dostoni», «Dil amri» kabi asarlari milliy adabiyotimiz xazinasidan munosib joy olgan, qator asarlari asosida badiiy filmlar suratga olingan, spektakllar sahnalashtirilgan.

Ma'lumki, Ikkinchi jahon urushi ko‘pchilik qatori yosh jurnalist va shoir Sharof Rashidovni ham o‘z girdobiga tortdi. U qonli urush boshlanishi bilan birinchilar safida frontga otlanib, eng olovli nuqtalarda jang qildi. Frontda ko‘rsatgan mardligi va jasorati uchun ikki bor jangovar «Qizil yulduz» ordeni bilan taqdirlandi.

U qattol yovga qarshi bir qo‘lida qurol, bir qo‘lida qalam bilan kurashdi, shu yillarda urush mavzusida o‘nlab o‘tli she'rlarini yaratdi.

Fashistlar Vatanimizga bostirib kirgan birinchi kuniyoq «Tarixning qahri-la qayradim qilich» she'ri yaratiladi:

G‘azab qilichida elim qahri bor,

G‘azab qilichining keskin zahri bor,

Yurakda qasosning toshqin nahri bor,

Qilichim, qahrimsan, yovga bo‘lgin yov!

Har bir satr orqali, har bir misra orqali dushmanga bo‘lgan kuchli nafrat, har kuni o‘zbek xonadonlaridan urushga jo‘natilayotgan navqiron yigitlarga suyanch bo‘lish, jigarbandini urushga kuzatayotgan onaizorlarning duolari, g‘alabaga katta ishonch «Qahramon xotirasi», «Jangchi», «Ofarin», «Belgrad qizi», «Yashasin sevgi!» she'rlari yozilishiga turtki beradi.

JANG QIL!

Fikrim senda, jang qil, madorim!

Qayrab olgan yarog‘ing bo‘lay,

Qon ichida o‘rtog‘ing bo‘lay,

Jang qil, mening madorim, orim!

Jang qil, yovga omon bermagin,

Jang qil, baxti – bahorim uchun;

Yorug‘ mash'al diyorim uchun,

Jang qil, mening mehribon yorim!

Jang qil, baxtim payhon bo‘lmasin,

Ko‘z yoshlarim ummon bo‘lmasin.

Shodmon ko‘ngil hech qon bo‘lmasin,

Jang qil, mening baxtim, bahorim.

Istaymanki, kunduzning kuni,

Tunning so‘nmas yulduzi bo‘lgin,

Adolatning sen ko‘zi bo‘lgin,

Jang qil, mening hayotim – borim.

Kerak bo‘lsa tez bayon etgin,

Jang ichida namoyon bo‘lay,

Zafaringda men ayon bo‘lay,

Jang qil, yongan chirog‘im, yorim!

1941 yil.

OFARIN

Ketdi dong‘ing o‘lka bo‘ylab, jangda o‘g‘lon, ofarin,

Mardligingdan yov boshiga yog‘di to‘fon, ofarin.

Shamshiring bor qayralibdir o‘ch – adolat toshiga,

Shiddating bor yovga ofat, etdi payhon, ofarin.

Kul qilib ko‘kka sovurmoq yovni oliy farz erur,

Sen elim deb yovni qirding, mardu maydon, ofarin.

Arg‘umoq ustida lochin – sen zafarning elchisi,

Mayli javlon ayla jangda, toza vijdon, ofarin.

Ol qasos, o‘g‘lon, g‘animdan barcha ketgan qon uchun,

Senga tikmish el ko‘zini, qayna vulqon, ofarin.

1941 yil.