Viloyat IIB Tezkor vazifalarni bajaruvchi safarbar ot­ryadida xodimlarning ma’naviyatini yuksaltirish, jangovar va jismoniy tayyorgarligini oshirish yo‘lida barcha imkoniyatlardan foydalanilmoqda. Xususan, otryadda «Ustoz-shogird» an’anasi yaxshi yo‘lga qo‘yilgani ayni muddao bo‘lyapti. 

– «Ustoz ko‘rmagan shogird – har maqomga yo‘rg‘alar» degan hikmat bejiz yaralmagan. Chunki ustoz ko‘rmagan shogird o‘sha sohaga oid tartib-qoidalarni, alohida yo‘nalishni bilmaydi. Bu esa o‘z xizmat faoliyati jarayonida bir qancha muammolarni keltirib chiqarishi mumkin, – deydi otryad komandiri o‘rinbosari, mayor Alisher Nazarov. – Jamoamizda tajribali murabbiylar anchagina. Ularning orasida guruh komandiri, katta serjant Ilhom Rustamovning o‘rni alohida ajralib turadi. 

Katta serjant Ilhom Rustamov 2007-yildan to hozirgi kunga qadar TVBSOda turli lavozimlarda faoliyat ko‘rsatib kelyapti. Ayni paytda kichik serjant Azamat Po‘latovga murabbiy etib tayinlangan. Azamatjon har doim ustozining nazoratida. 

– Men ham uzoq yillik faoliyatim davomida ustozlarimga alohida mehr qo‘yib, kam bo‘lmadim, – deya Ilhom aka yangi ishga kirgan paytini xotirladi. – Yuridik texnikumni tugatib, o‘zim tug‘ilib o‘sgan Romitan tumani «Yaxshi Navro‘z» mahalla fuqarolar yig‘inida mahalla posbonlar sardori bo‘lib ish boshladim. O‘shanda mahalla profilaktika inspektori bo‘lgan leytenant Akbar Bafoyevdan hujjat ishlarini olib borishni va aholi bilan muomala qilishni puxta o‘rgandim. Ikki yildan so‘ng Akbar akaning tavsiyasi bilan ichki ishlar organlari xizmatiga o‘tdim. Mana, shunga ham yigirma uch yil bo‘lyapti. 

Xavfli jinoyatchilarni qo‘lga olish­da ko‘rsatgan jasorati va mardligi uchun «Sodiq xizmatlari uchun» medali bilan mukofotlangan katta serjant Ilhom Rustamov xizmat burchi­ga sadoqati, tartib-intizomga qat’iy rioya qilishi bilan boshqalarga ibrat bo‘lmoqda. 

Mirzoqul AHADOV,

o‘z muxbirimiz.

Buxoro viloyati.