Ichki ishlar organlari tizimida ham yurtimiz faxriga aylangan dongdor chempionlar yetarlicha. Ulardan biri poytaxtning Yunusobod tumani IIOFMB huzuridagi Tergov bo‘limi jinoyatlarni tergov qilish bo‘linmasi tergovchisi, kapitan Faxriddin Sharipovdir. Qahramonimiz bolaligida otasi bilan boks zaliga birga borgan, mashg‘ulotlarda qatnashgan va shu orqali sportga kirib kelgan. 

Sharipovlarni sportchilar oilasi, deyishadi. Negaki, Faxriddinning otasi boks bilan professional shug‘ullangan, ukasi va amakilari ham sportchi bo‘lgan. U boshqalardan farqli ravishda, bitta sport turini tanlamadi. Baravariga sambo hamda dzyudo bilan shug‘ullanishga kirishdi. Dastlab, sambo bo‘yicha bir necha bor O‘zbekiston va Osiyo chempioni bo‘lgach, asosiy e’tiborini dzyudoga qaratdi. Sababi, sambo sport turi sifatida olimpiada dasturlariga kiritilmagan edi. 

Natijada, dzyudo bo‘yicha ketma-ket mamlakat chempionligini va ko‘plab xalqaro turnirlar g‘olibligini qo‘lga kiritdi. U O‘zbekiston dzyudo terma jamoasi safida nufuzli musobaqalarda qatnashdi. 2018-yilda ichki ishlar organlariga xizmatga qabul qilingan Faxriddin Sharipov sportchi sifatida tizim faxriga aylandi. 

Xususan, 2022-yilning 7–11-sentabr kunlari Polshaning Krakov shahrida bo‘lib o‘tgan dzyudo bo‘yicha jahon chempionati bronza medalini qo‘lga kiritdi. O‘sha yili Fransiyaning Nant shahrida o‘tkazilgan «Gran-pri» turnirida faxrli 1-o‘rinni egalladi. 2023-yilning 26–29-may kunlari Rossiya Federatsiyasining Moskva shahrida o‘tkazilgan ichki ishlar organlari va Qurolli Kuchlar tuzilmalari xodimlari o‘rtasida tashkil etilgan dzyudo bo‘yicha xalqaro turnirda MDH davlatlari vakillari to‘rt guruhga bo‘lingan holda, jamoaviy tarzda kurash olib bordi. Faxriddin Sharipov jamoaviy bahslarda oltin medal va kubokning qo‘lga kiritilishida o‘zining munosib hissasini qo‘shib, final bellashuvida mezbon Rossiya terma jamoasi a'zosini mag‘lub etdi. 2023-yil so‘ngida Birlashgan Arab Amirliklarining poytaxti Abu Dabi shahrida «Katta dubulg‘a» turnirining dzyudo bo‘yicha sport ustalari o‘rtasidagi jahon chempionatida 100 kg vazn toifasida faxrli 3-o‘rinni zabt etdi.

Kapitan F. Sharipov kitob mutolaasini ham kanda qilmaydi. Agata Kristi, Den Braun, Aleksandr Dyuma asarlarini sevib o‘qiydi. 

Ichki ishlar organlari xodimlarining jismoniy tarbiya va ommaviy sport bilan muntazam shug‘ullanishi xizmat vazifalarini bajarish vaqtida o‘zini o‘zi himoya qilish bo‘yicha maxsus jismoniy tayyorgarlik usullarini yetarli darajada o‘zlashtirishi nuqtai nazaridan ham juda muhimdir. Chempion xodimdan kelgusi musobaqalarda ham oltin medallarni kutib qolamiz!

Abror POYONOV,

o‘z muxbirimiz.