Pandemiya davrida Rossiyada qolib ketgan O‘zbekiston fuqarolari vatanga qaytishida qulaylik yaratish maqsadida dekabrda 8 ta maxsus poyezd qatnovi amalga oshiriladi. Bu haqda “O‘ztemiryo‘lyo‘lovchi” AJ matbuot xizmati xabar berdi.

Qayd etilishicha, 4-dekabr kuni soat 20:57 da “Voljskiy” temiryo‘l vokzalidan ushbu poyezdning birinchi reysi qatnovi boshlangan. Qolgan reyslari 6, 10, 13,17, 20, 24, 27-dekabr kunlari soat 20:57 da ushbu temiryo‘l vokzalidan harakatini amalga oshiradi.

Mazkur poyezdga faqat bir tomonga, ya’ni Voljskiy—Toshkent yo‘nalishiga chiptalar sotiladi. Chiptalarni elektron tarzda ham sotish yo‘lga qo‘yilgan. Rossiyadagi fuqarolarning yaqinlari O‘zbekistonda turib, ularning shaxsini tasdiqlovchi hujjatining nusxasi bilan “O‘zbekiston temir yo‘llari” veb-sayti orqali E-ticket.railway.uz’dan chiptalarni elektron tarzda xarid qilib, jo‘natishi ham mumkin.

Qo‘shimcha ma’lumotlarni Toshkent shahrida 1005 qisqa telefon raqami, joylardagi temiryo‘l kassalari hamda ma’lumotlar byurosidan bilib olish mumkin.

Bundan avval Rossiyada qolib ketgan o‘zbekistonliklarni qaytarish uchun oktabrda 3 ta, noyabrda 6 ta maxsus poyezd reysi yo‘lga qo‘yilgandi.