Afg‘onistonda hokimiyat tepasiga kelgan “Tolibon” 2022-yilda qizlar uchun maktablar ochishga va’da berdi, deb yozadi “Interfaks”.

“Mamlakat bo‘ylab qizlar uchun maktablar yangi ta’lim rejasi tugaganidan keyin kelgusi yilda ochiladi”, — deya ma’lum qildi toliblar bosh vazir o‘rinbosari mavlaviy Abdul Kabir Turkiya elchisi Jihod Argin bilan uchrashuvda.

Kabirning so‘zlarini “Tolibon” rasmiy vakili Zabihulla Mujohid o‘z Twitter’ sahifasida keltirgan.

Kabirning aytishicha, ayollar mamlakatdagi turli muassasalarda, masalan pasport stoli, aeroport va sog‘liqni saqlash sohasida shuningdek, aksariyat viloyatlardagi maktablarda faoliyat olib bormoqda.

Uning so‘zlariga ko‘ra, “Afg‘oniston barcha davlatlarning, ayniqsa Turkiyaning qo‘llab-quvvatlovi va hamkorligiga muhtoj. Toliblar Turkiyaning Afg‘onistonga ko‘proq sarmoya kiritishini istaydi”. Kabir Turkiya nodavlat tashkiloti TICA’ning Afg‘onistondagi faoliyatini yuqori baholagan.

O‘z navbatida, Turkiya elchisi uning mamlakati “Qizil yarim oy” tashkiloti orqali afg‘on qochqinlari va ichki ko‘chirilganlarga yordam ko‘rsatganini, yordam hali ham davom etayotganini aytgan

Diplomatning so‘zlariga ko‘ra,Turkiya Afg‘oniston Qishloq xo‘jaligi vazirligini urug‘lik bilan ta’minlamoqchi. Shuningdek, Qandahor, Hirot viloyatlari va Kajaki tumanida Turkiya tomonidan moliyalashtirilgan qurilish loyihalari bo‘yicha ishlar davom ettiriladi.

Bundan tashqari, Turkiya elchisi turk sarmoyadorlari Afg‘onistonga sarmoya kiritishdan manfaatdor ekanini, ulardan bir nechtasi kelasi haftada mamlakatga tashrif buyurishini ma’lum qilgan.

“Tolibon” mamlakatda yana hokimiyat tepasiga kelgan avgust oyida harakat matbuot kotibi Zabihulla Mujohid ayollarga “islom qonunlari doirasida” ishlash, o‘qish va jamiyat boshqaruvida ishtirok etishga ruxsat berilishini aytgan. Shu bilan birga, toliblarning shartlariga ko‘ra, Afg‘onistonda ayollarning barchasi hijob (paranji) kiyishi kerak bo‘ladi.

Keyinchalik Mujohid Afg‘onistondagi ishlaydigan ayollarni o‘z xavfsizligi uchun uydan chiqmaslikka chaqirgan. “Bizning xavfsizlik kuchlarimizga ayollar bilan qanday munosabatda bo‘lish, ular bilan qanday muloqot qilish haqida o‘rgatilmagan. Mamlakatda to‘liq xavfsizlik o‘rnatilmaguncha ayollardan uyda qolishini so‘raymiz ”, — degan harakat vakili.

Shuningdek, “Tolibon” ayollarga hukumat tarkibida lavozimlar berilmasligini ma’lum qilgan.

Sentabr oxirida Kobul universitetining “Tolibon” harakati tomonidan tayinlangan yangi rektori Muhammad Ashraf G‘ayrat ushbu oliygohda xotin-qizlarning dars berishi yoki ta’lim olishini taqiqladi. Keyinroq G‘ayrat taqiq doimiy emas, vaqtinchalik ekanini ma’lum qildi.