"Hududgaztaʻminot" AJ Matbuot xizmatining xabariga ko'ra, zamonaviy elektron gaz hisoblash uskunasi hali o'rnatilmagan 1,5 mln isteʻmolchilar sarflangan gaz uchun eski namunadagi gaz hisoblagichlarining ko'rsatkichlari bo'yicha to'lov qilishni davom ettirmoqda. Lekin, ushbu isteʻmolchilarda yangi hisobdonlar o'rnatilgunga qadar o'z xonadonlaridan chiqmay turib isteʻmol qilingan yoqilg'iga to'lov qilish uchun maxsus Telegram-bot ham yaratilgan.

Qayd etilishicha, gaz taʻminoti filiallari va bo'limlari tomonidan doimiy ravishda berilayotgan bildirishlar va shartnomaviy majburiyatlarga qaramasdan, ayrim isteʻmolchilar yetkazib berilgan tabiiy gaz uchun har oyning 10 sanasiga qadar to'lovlarni amalga oshirmayapti.

Natijada esa, isteʻmolchilar tomonidan katta qarzdorlik yuzaga kelmoqda va qarzga nisbatan vaqtida to'lov qilinmaganligi sababli penya hisoblanmoqda.

Berilgan maʻlumotga ko'ra, bugungi kunga kelib 1,2 milliondan ortiq isteʻmolchining tabiiy gaz uchun 501,6 milliard so'm miqdordagi debitorlik qarzdorligi mavjud. 

"Tez orada butun mamlakatimiz bo'ylab "aqlli hisoblagichlar"ni o'rnatish ishlari yakunlanadi. Yangi hisobdonlar ishga tushgach isteʻmolchiga baribir qarzdorligini qoplashga to'g'ri keladi. Bundan tashqari, asosiy qarzdorlikni bartaraf etish bilan birga unga nisbatan hisoblangan penyani ham to'lash talab qilinadi. Aks holda istemolchi gaz taʻminoti tizimidan avtomatik ravishda uzib qo'yiladi", - deya ogohlantiriladi xabarda.