Vladimir Norov Amerika Qoʻshma Shtatlari Davlat Departamentining Afgʻoniston boʻyicha maxsus vakili Tomas Vestbilan uchrashuv oʻtkazdi

Foto: Tashqi ishlar vazirligi

2022-yil 21-sentyabr kuni Nyu-York shahrida Oʻzbekiston Respublikasi Tashqi ishlar vaziri Vladimir Norovning Amerika Qoʻshma Shtatlari Davlat Departamentining Afgʻoniston boʻyicha maxsus vakili Tomas Vest hamda AQSHning Afgʻon ayollari, qizlari va inson huquqlari boʻyicha Maxsus vakili Rina Ameri bilan muzokaralari boʻlib oʻtdi.

Uchrashuv davomida Afgʻonistonda uzoq muddatli tinchlikka erishish, uning iqtisodiyotini tiklash, ushbu mamlakatda murakkab ijtimoiy-gumanitar vaziyatni hal etishga koʻmaklashish boʻyicha Oʻzbekiston-Amerika hamkorligini yanada kengaytirish istiqbollari muhokama qilindi.

AQSH Maxsus vakillarining taʼkidlashicha, joriy yilning iyul oyida Toshkentda boʻlib oʻtgan Afgʻoniston boʻyicha xalqaro konferensiya mazkur davlatdagi vaziyatni yoʻlga solish borasida jahon hamjamiyatining izchil yondashuvlarini ishlab chiqish uchun samarali platforma yaratdi.

Afgʻoniston xalqini qoʻllab-quvvatlash boʻyicha xalqaro saʼy-harakatlarni jadallashtirish va tizimlashtirish zarurligiga alohida eʼtibor qaratildi. Shu nuqtayi nazardan, Termiz shahrida tashkil etilgan Afgʻonistonga gumanitar yordam yetkazib berish uchun Koʻp funksiyali transport-logistika xabining imkoniyatlaridan foydalanish muhimligi eʼtirof etildi.