Spot robotini o‘lchami, to‘rtta “panjaga” tayanib yurish uslubi va o‘ziga xos cheklovlari — dunyoni to‘liq ranglarda ko‘ra olmasligi sabab itga o‘xshatishadi. So‘nggi fakt o‘zgarishga uchradi va endilikda robot-it dunyoni rangli ko‘rishni boshladi, deb xabar beradi Gismodo.

Boston Dynamics kompaniyasi Spot’ga beshta stereokamerani o‘rnatdi — ular robot tanasining turli qismlarida joylashgan va atrof-muhitni 3D formatda ko‘rsatishga xizmat qiladi. Endilikda ular to‘laqonli tasvirni hosil qiladi, shuningdek, chuqurlik va aniqlik bo‘yicha to‘liq yaxshilangan ma’lumotlarni taqdim etadi.

Ishlab chiqaruvchining hisoblashicha, ushbu o‘zgarish Spot avtonomligining biroz oshirilishiga va masofadan turib boshqaruvchi operatorlarga dunyoni Spot’ning ko‘zlari bilan rangli ko‘rish imkoniyatini beradi.

Robot-itning ko‘zi o‘zgarishi bilan birga, unga Spot CORE I/O yuqori samaradorlikka ega foydali kompyuter yuklamasi hisobiga 5G aloqa tarmog‘i o‘rnatilgan. U mexanik itga NVIDIA Jetson Xavier NX modulidan foydalanish orqali, turli obyektlarni uzluksiz kuzatish va ularga bog‘liq ma’lumotlarni to‘plash imkonini beradi. Bularning barchasi Spot’ga sanoat maydonchalarida xavfsizlikni qo‘llab-quvvatlagan holda ishlashiga xizmat qiladi.

Ma’lumot uchun, robototexnikaga ixtisoslashgan Boston Dynamics kompaniyasiga Mark Raybert va Massachusets texnologiyalar institutining bir guruh muhandislari tomonidan 1992-yilda asos solingan. 2013-yil oxirida kompaniyani Google sotib olgan, 2017-yilda esa Yaponiyaning yirik investori — SoftBank. 2020-yilda Boston Dynamics sakkizta robotlar modelini taqdim etdi, xususan, antromorf Atlas robotini ham.

Bundan oldin Boston Dynamics’ning robot-iti 74,5 ming dollardan sotuvga chiqqani, u Singapur bog‘ida odamlar orasidagi oraliq masofani tekshirishni boshlagani to‘g‘risida xabarlar berilgandi.